Archive

شيافة

 

 

مساء الخير،

علاقتي مع المطبخ علاقة ودّية ولله الحمد وغالبًا ماترتبط بالمود، يعني كلّ ما زاد روقاني زادت رغبتي بالطبخ وهكذا، ولأني من عشاق الباستا فغالبًا ما أطبخ إلّا هي 😀 وعندي طريقة أحبها وأقدّرها جدًا وخلّيت أهلي وصحباتي يدمنوها :d  صحيح إنّي أول مرّة سويتها كانت أقرب إلى نظام “افتح الثلاجة واكبكب” منها إلى إنها طريقة ومقادير وهكذا بس عادي أهم شي إن النتيجة مُشرّفة 😀 ..

لمّا كنت أنزّل الصور في الانستقرام وتويتر كانت تجيني كثير أسئلة عن طريقتها ولما يجربون الطريقة اللي أعطيهم يقولون ماضبطت معنا! لذلك قررت أصور الخطوات وإن شاء الله تعجبكم 😀

 

 

المقادير:

*باستا (أي نوع تحبونه)

*دجاج فيليه (صدور دجاج)

*خضروات ( ثوم_بروكلي_كوسا_جزر_طماطم_فلفل رومي_ليمون)

*بهارات (ملح_فلفل أسود_زنجبيل مطحون)

*زعتر برّي (أوريقانو)

*خل قصب السكر.

*صلصة طماطم.

*حليب.

*طحين.

*قشطة خفق.

*جبن كرافت

*جبن موزاريلا.

 

 

الطريقة :

 

نقطع الفلفل الرومي والكوسة والجزر والبروكلي، طبعّا الخضار على حسب رغبتكم أي خضار تحبونها ضيفوها ..

 

 

 

هنا بعد التقطيع 😀

 

 

 

نحط شوية زيت في ونخليه يحمى بعدين نضيف فيليه الدجاج المقطع..

 

 

 

نهرس 3 فص ثوم ونضيفه للدجاج ..

 

 

 

أول مايتغيّر لون الدجاج نضيف حلقات الجزر لأنه ياخذ وقت طويل على مايكون لين، ثم نضيف ملح + زنجبيل مطحون + فلفل أسود، بعدين لمّا يكون الدجاج نص استوا نضيف الكوسا ..

 

 

 

بعد مايستوي الدجاج وتحمرّ الكوسا شوي نضيف الفلفل الرومي+والبروكلي + الزعتر البرّي (أوريقانو) لأنهم ماياخذوا وقت طويل على النار، وبعدها نصب عليهم خل قصب السكر بمقدار ربع كوب تقريبًا عشان يعطي الخضار والدجاج نكهة قوية  -اللي مايعرف الخل هنا صورته- ونبشر عليهم شوي من قشر الليمون + عصير نصف ليمونة ..

الحين نسوي الصلصة، وأنا احطها فخلاط الكاس قبل النار حتى مايتعقد معي الطحين والطماطم تتمازج معه كويس، الصلصة عبارة عن كوب حليب + 3/4 كوب قشطة خفق + نصف علبة تشيدر صغيرة مبشورة + 3 ملاعق طحين أبيض طماطتين + صلصة الطماطم الحمرا الجاهزة..

 

 

 

نضيف الصلصة للخضار والدجاج ونخليهم 7 دقايق تقريبًا ..

 

 

 

بعدها نضيف باستا مسلوقة بمويا وملح للخضار والدجاج ومعهم نصف كوب موزريلا ونحركهم شوي شوي عشان ماتتقطع الباستا والخضار 😀 ولازم تاكلوها فوقتها ولا تنشف وماتكون كويسة، إذا بتسوونها قبل ماتاكلونها بوقت طويل لا تخلطون الاشياء، يعني نخلي الصلصة على جنب والباستا المسلوقة على جنب والخضار والدجاج لحالهم ووقت التقديم نحطهم على النار ونخلطهم ..

 

 

 

وصحتين وعافية 😀

 

 

______________________________________

 

*إذا حابين الصلصة تكون كثيفة زيدوا مقدار الحليب وقشطة الخفق، كنت أسويها من قبل كذا لكن تصير ثقيييلة مره، هنا صوره لمرّه سويت فيها الباستا بصلصة كثيفة ..

 

ترا حتى لو كان شكل الثانية أحلى الأولى ألذّ :d ..